News just reach us say Israeli army don claim say dem don kill Hezbollah leader, Hassan Nasrallah, for one airstrike wey dem carry out for Beirut inside Lebanon. Dem say na Friday night everything happen.
Hezbollah never still yan anything about the mata. Israeli army talk say dem fighter jets target places wey dem believe say belong to Hezbollah for Dahiyeh, one area for southern suburb of Beirut.
According to IDF, dem say Nasrallah dey use the place wey dem bomb as him headquarters to dey plot terror activities against the people of Israel. Nasrallah don turn Hezbollah to strong non-government group wey strong well well for di region.
Hezbollah get loyal supporters for Lebanon, Iraq, Syria, and Yemen. Dem dey among the strong political force for Lebanon. Even though West dey call Hezbollah terror group, Hezbollah don get big control for political ground for dia side.
Lebanon state news agency talk say Israeli forces bomb di Dahiyeh area till buildings turn dust, and many people dey hospital with different injuries according to Lebanon health ministry.
CNN reporters wey dey ground talk say dem see bright light and hear loud gbosaa as Israeli missiles dey land for different parts of di city. Di IDF say dem dey target places wey dem believe say Hezbollah dey use as command centers and weapon storage. But Hezbollah deny say dem dey keep weapons for civilian buildings wey Israeli dey target.
All these things just dey happen now, so we go dey bring more update as tori dey develop.
