Telegram wey many people know as messaging app wey dey prioritize speed and security don decide say dem go dey give govment IP address and phone number of people dem wey dey do anyhow for dia platform. Dis one na big change for the platform wey before dey waka like say dem no dey answer to any govment.
Di CEO of Telegram, Pavel Durov, yarn dis matter for im Telegram channel wey get 13 million followers. Im talk say, “We don clear say anybody wey no obey our rule, we fit give their IP address and phone number to authorities if dem bring correct legal request.” Before now, Telegram no dey release any data unless na terrorist matter dem bring court order.
Dis new move come one month after dem arrest Durov for France based on say im app dey house plenty illegal activities, and e no dey cooperate with govment for investigation. Before now, plenty people dey support Durov for him decision to no dey give govment access to user data, which na wetin make some criminal groups, political dissidents, and even military for Russia and Ukraine dem sef dey use the app.
Even after dem talk say Telegram dey support illegal tins, di CEO yarn say dem don make im search function “safer” to stop people wey dey sell illegal goods. Dem talk say dis new change na because dem wan dey publish more transparency reports about how dem dey cooperate with authorities, and dem go dey do am every three months now, before na every six months.
