IKENNE, Jihar Ogun, Najeriya – Remo Stars na fatan ci gaba da rike matsayinsu na daya a teburin gasar Firimiya ta Najeriya (NPFL) a ranar Asabar, yayin da za su karbi bakuncin tsoffin zakarun Kano Pillars a wasan mako na 23 a Ikenne.
n
Remo Stars a halin yanzu suna da tazarar maki takwas a saman teburin, sai kuma 3SC, wanda shi ma zai karbi bakuncin Bendel Insurance a matsayi na biyu. Remo Stars, wadanda ba su yi rashin nasara ba a wasanni biyar da suka gabata kuma ba a doke su ba a wasanni bakwai da suka wuce, za su shiga karawar ta yau da kwarin gwiwa, sabanin abokan karawarsu da suka samu nasara a wasanni biyu kacal daga cikin biyar da suka buga a baya-bayan nan, wanda ya kara dagula lamarin dakatar da koci Usman Abdallah da shugabannin kungiyar suka yi.
n
Remo za ta kuma yi fatan kammala doke tsoffin zakarun bayan da ta samu nasara a wasan farko da ci 2-0 a Katsina.
n
Da aka tambaye shi game da yiwuwar sakamakon wasan, kocin Remo Stars, Daniel Ogunmodede, bai yi kasa a gwiwa ba lokacin da ya ce, “Tabbas maki uku ne” bayan nasarar da suka samu a kan Sunshine Stars da ci 2-1 a makon da ya gabata.
n
Kocin riko na Kano Pillars, Ahmed Garba, zai fuskanci babban kalubale na kaucewa hakan a wasansa na farko da zai jagoranci kungiyar. Nasara ga Remo Stars za ta kai su maki 48, amma yawan makin da za su samu ya dogara da sakamakon wasan da za a yi tsakanin 3SC da Bendel Insurance.
n
Sakamakon tabarbarewar da Pillars suka yi a baya-bayan nan, sun fadi zuwa matsayi na 12 a gasar da maki 29 kacal bayan wasanni 21.
n
Kano Pillars za ta buga wasan ba tare da dan wasan tsakiya Mustapha Umar ba a wasansu da Remo Stars, saboda dakatar da shi da aka yi sakamakon tarar katin gargadi. Umar ya kasance daya daga cikin ‘yan wasan da suka fi taka rawa a Sai Masu Gida a kakar wasan bana.
n
Dan wasan mai shekaru 19 ya buga wasanni 21 a gasar, inda ya zura kwallaye biyu kuma ya taimaka aka zura kwallo daya. Rashin sa zai zama babban rashi ga Sai Masu Gida, wadanda ke cikin mawuyacin hali.
n
Kano Pillars za ta kara da Remo Stars a filin wasa na Remo Stars a ranar Asabar.
