Nigeria goment don tanda new monthly allawee for National Youth Service Corps (NYSC) members, from di previous 33,000 naira to 77,000 naira per month. E mean say di kopa dem go dey collect extra 44,000 naira every month.
Dem say di new payment go back date to July 2024. Dis announcement na from di NYSC tok-tok pesin, Caroline Embu, wey confirm say na part of di National Minimum Wage (Amendment) Act 2024 implementation. Di tok say di confirmation na in di letter from di National Salaries, Incomes and Wages Commission wey get September 25th 2024 as di date, and di oga wey sign am na Ekpo Nta.
Na for July di lawmakers pass di National Minimum Wage Act 2024, wey mean say every oga wey dey employ person for work must pay dem at least 70,000 naira per month. Dis na as di president gree with organised labour union say di minimum wage must increase for di kontri.
Before dis increase, Nigerian workers dey suffer, dem dey complain say di 30,000 naira wey be minimum wage before no dey reach anything if dem consider di harsh economic situations. Before 2019, dat 30,000 naira dey worth $80, but now na devaluation of naira don cause wahala.
President Bola Tinubu and di labour union bin gree say di new minimum wage of 70,000 naira must begin work immediately, as di federal lawmakers don tanda di Minimum Wage Act 2024.
Embu talk say di NYSC Director General, Brigadier General YD Ahmed, don beg di Chairman make dem put beta welfare package for Corps members. E still thank di Federal goment as dem dey implement di welfare package quick quick. Im beleive say dis new allawee go reduce di suffer wey Corps Members dey face, boost dia morale and ginger dem to serve di nation well well.
NYSC na national service wey dey compulsory for graduates from higher institutions for Nigeria since di 1970s. Di programme dey try unite di different ethnic groups by posting di members to different parts of Nigeria wey no be dia usual base.
