Nyesom Wike, ministan yankin tarayya na Najeriya (FCT), ya yi farin ciki da kammala karatun digiri na biyu na shari’a (LLM) da danshi, Jordan, ya samu a Jami’ar Queen Mary da ke London, Burtaniya. Wike ya bayyana farin cikinsa ta hanyar wani sakon da ya aika a shafinsa na X, inda ya ce yana matukar farin ciki da ci gaban da danshi ya samu a fannin karatunsa.
“Na yi farin ciki da halartar bikin kammala karatun danshi, Jordan, tare da matata, wanda ya samu digiri na biyu a fannin shari’a (LLM) a Jami’ar Queen Mary da ke London. A matsayina na uba, ina farin ciki da ci gaban da Jordan ya samu a fannin karatunsa,” in ji Wike a cikin sakonsa.
Wike ya kuma raba wasu hotuna da aka dauka a lokacin bikin kammala karatun, inda matarsa, Eberechi Wike, wacce ita ce alkali a kotun daukaka kara, ta kasance cikin hotunan. A watan Yuli na shekarar 2022, Jordan ya samu digiri na farko a fannin shari’a daga Jami’ar Exeter da ke Burtaniya.
Nyesom Wike, wanda ya kasance gwamnan jihar Rivers daga shekarar 2015 zuwa 2023, ya zama ministan yankin tarayya bayan shugaba Bola Tinubu ya nada shi a matsayin ministan FCT. Duk da haka, bikin kammala karatun danshi ya jawo cece-kuce a shafukan sada zumunta, inda wasu masu fafutuka suka yi tir da Wike saboda rashin ingantaccen tsarin ilimi a Najeriya.
Omoyele Sowore, mai fafutukar kare hakkin bil’adama kuma wanda ya kafa kungiyar #RevolutionNow, ya yi tir da Wike saboda bai gina makarantu masu inganci a Najeriya ba, yayin da yake aika ‘ya’yansa zuwa kasashen waje don karatu. “Kun kasance gwamna na jihar Rivers na shekaru takwas, kuma kun yi amfani da dukiyar jihar amma ba ku gina makarantar da za a iya kammala digiri a cikinta ba. Abin kunya ne!” in ji Sowore a cikin wani sakon da ya aika.
