Mr Joe Igbokwe, wey be big man for All Progressives Congress (APC) for Lagos State and big supporter of President Bola Tinubu’s government, don open mouth talk say di people wey go fit save Nigeria neva even born.
Igbokwe, wey dey kampaign for Tinubu before di 2023 general elections, talk say di cost of living for di kontri don dey alarm people. For one Facebook post on Friday, Igbokwe yan say one bag of rice don reach N100,000.
“With all di rice mills wey we get for Nigeria, my wife just tell me say one bag of rice don cost N100,000 plus. Make e no be like say I dey brag, I gatz talk say di men and women wey go fit save dis kontri from di suffer and cry neva born,” na so im write for Facebook.
Recently, dis Igbokwe wey don serve under almost every Lagos governor since 1999, don dey criticize some of Tinubu government policies, wey bi say e don dey change im stand.
Two weeks ago, e been dey complain about di increase for electricity tariff, as e dey beg Tinubu make e look into am.
For another Facebook post three weeks ago, Igbokwe yan say di N20,000 units wey e buy no even last am reach one day.
He talk say: “PBAT, abeg look into di new electricity tariff for Nigeria. E go kill business if government no act fast fast. I get small office for Surulere with about 7 units of AC.
“Before, we dey buy 300 plus units for N20,000. Yesterday we buy N20,000 worth of units and e last just one day. Dem dey call am band A group. I dey pray make dem review am.”
