AC Milan sun bayyana cewa ba za su biya dukkan albashin dan wasan Manchester United Marcus Rashford ba yayin da suke kokarin daukar shi aro. Rashford, wanda ya bayyana aniyarsa na barin Old Trafford, yana kan albashi na £325,000 a mako, wanda ya fi iyakar AC Milan.
Bayan tattaunawa da wakilin Rashford, Dwaine Maynard, AC Milan sun fahimci cewa ko da rabin albashin dan wasan ba zai yiwu ba. Alvaro Morata, wanda shine dan wasan da ya fi karban albashi a kulob din, yana karban £150,000 a mako.
Kulob din Como na Serie A ya bayyana cewa suna da damar daukar Rashford, duk da cewa suna cikin matsayi na 16 a gasar. Como, wanda tsohon dan wasan Manchester United Raphael Varane ke wakilta, suna da karin gurbi a cikin tawagarsu don daukar dan wasan aro.
Rashford ya kuma tattauna tare da Juventus, kuma ana sa ran tattaunawar za ta ci gaba a ranar Alhamis. Bayern Munich na Jamus kuma sun shiga cikin gwagwarmayar daukar dan wasan.
Manchester United sun sanya wadannan sharudda biyu don Rashford: ko wace kungiya da za ta dauke shi aro dole ta biya rabin albashinsa, kuma dole ne ta sanya wajabcin siye a karshen lokacin aro.
Rashford, wanda ya fito daga makarantar matasa ta Manchester United, ya kasance daya daga cikin manyan ‘yan wasan da aka yi imanin za a iya sayar da su saboda matsalolin kuɗi da kulob din ke fuskanta.
