E get one bobo wey dem dey call Samu Omorodion wey don dey make ogbonge headlines for ball wey him dey play. Dem dey even yan sey na ‘The New Osimhen’. Last match, di guy scatter show for one kpom-kpom mata wey end 3-3 for Estadio Dedragao for Portugal. Him nack two goals ontop Manchester United for UEFA Europa League match wey FC Porto dey play.
Manchester United bin soon take di lead early for di second half with two quick goals from Marcus Rashford and Rasmus Højlund, but Pedro come reduce di deficit. But before halftime finish, Omorodion don do him magic, he score him first goal for di UEFA Europa League against di Red Devils as he drag Porto come level for di night.
Na inside second half, few minutes after start-up, naim di young sharp striker score again to give Porto lead. Di goals dey sweet dem belle, until English defender, Harry Maguire, carry him head join level for di first minute of injury time, con share di point.
Samu Omorodion, dey hot o! Dem talk sey Chelsea dey eye am during summer transfer but e no work, but di bobo still dey burst net for Porto. Right now, him don score 4 goals for 4 league games dis season, and total of 7 for 6 matches across all di competitions dem dey play.
Di guy sabi himself, e don dey yan say to comot am from Porto, e go take big money, as e release clause na €100 million. For him career, e don play for clubs like Recreativo Granada, Granada, Atletico Madrid, Alaves and now Porto, making 34 goals in 78 matches.
As for national team matter, Omorodion get choice, he fit play for Nigeria and Spain. Although, na for Spain youth level dem don dey see am, and even for di 2024 Summer Olympics, he follow Spain win gold with 5-3 victory over France.
