Millie Bobby Brown, di popular actress wey dey shine for ‘Stranger Things’, don marry Jake Bongiovi, wey be di 22-year-old pikin of music legend Bon Jovi, inside one low-key ceremony for Italy. Di tin happun for Villa Cetinale Roman, one baroque-style villa for Tuscany. Na for Instagram wey dem take share di beautiful pictures of di event.
Millie Bobby rock one custom gown wey Galia Lahav make for her. Di gown na real masterpiece wit cathedral veil; she even style am wit another strapless satin minidress wey she take enter di dance floor as she chill with her husby. Jake sef no carry last as him rock Tom Ford suit, stand dey pose wit him papa, Bon Jovi, for one of di pictures.
Dem talk say di wedding na small gathering of family and close friends, buh e carry heavy style as di event planner sabi arrange as e suppose be. Sandra von Riekhoff, di wedding photographer, yan say di event dey unique wit expert level design.
Bon Jovi bin tok for ‘Di View’ say di wedding sweet wella, say di bride dey look gorgeous and Jake dey happy like pikin wey see bobo juice. Dem even take their post-wedding celebrations enter Universal Orlando Resort wey dem share for dem Instagram Story.