Di Federal Government don come out to yarn say di rumours wey dey fly for social media about Defence Minister, General Christopher Gwabin Musa (Rtd), wey allegedly resign, na pure lie.
For one statement wey dem release on Monday, Minister’s Special Assistant on Media, Leah Katung-Babatunde, call di report “malicious” and “entirely fabricated.” She say make public no gree believe am.
Di statement, wey get title “False Rumour Regarding the Honourable Minister of Defence,” explain say dem notice some online reports wey claim say General Musa want comot from im position.
“We wish to state unequivocally and in the strongest possible terms that these rumours are absolute falsehoods borne out of complete mischief,” di statement tok.
E add say General Christopher Gwabin Musa (Rtd), OFR, still dey fully focus for im work and im mind dey for how to carry out di Federal Government defence and security agenda.
Di government yarn say di minister still dey committed to oversee di nation defence strategy and deliver im mandate.
Dem also urge members of public and media organisations to always verify information through official channels before dem publish or share am.
“The general public is hereby urged to disregard this fake news. We strongly advise media outlets and internet users to desist from spreading unverified information and to seek clarification from the office on matters concerning the Minister,” di statement add.
Di Federal Government don reiterate say di Defence Minister still dey office and dey do im work well-well.
