Nigeria Federal Government don announce say di sixth and final evacuation flight from South Africa go arrive on Wednesday, 15 July 2026, wit 315 returnees. Dis na di last batch of Nigerians wey dey comot from South Africa under di voluntary repatriation programme.
Di Ministry of Foreign Affairs tok-tok pesin, Kimiebi Imomotimi Ebienfa, tok for statement on Tuesday say di flight go bring di total number of evacuated Nigerians to 1,141 since di exercise start for early June.
Di previous batch, wey Air Peace operate, land for Murtala Muhammed International Airport for Lagos on Thursday night wit 282 returnees. Dat flight bin dey scheduled to arrive on Wednesday but delay because of technical issues wey di aircraft get.
Di Federal Government bin start di evacuation after anti-migrant protests wey dey raise concerns about safety of foreign nationals for parts of South Africa. Many African kontris, including Malawi, Zimbabwe, Kenya, Mozambique and Ghana, also organise voluntary repatriation programmes for dia citizens wey ready to comot from South Africa.
Di protests don lead to diplomatic katakata between South Africa and some African govments. Allegations say foreign nationals na di target of di attacks dey continue to dominate conversations, but South Africa president bin deny dis claim. Tori of pipo wey don kpai sake of di kasala dey too, but South African authorities say dis claims no be true. Pipo still dey call for independent investigation.
Meanwhile, di protest for South Africa don enta anoda level. South African protesters don begin go door-to-door to force immigrants to comot from dia houses, according to Reuters. For Alexandria township, Johannesburg, one Reuters reporter bin see how protesters dey breakdown doors dey enta houses wey dem believe say na wia undocumented immigrants dey hide. Dem bin escort di pipo enta police vans, including one woman from Malawi and her small pikin. Anoda man wey dem catch give police dey stay for di kontri legally.
Di leader of di movement, former radio presenter Jacinta Ngobese-Zuma, bin tok say na evri Thursday di protests go dey happun until dem meet dia demands. Di group March and March, wey dey lead di protest, bin accuse undocumented immigrants say na dem dey cause di economic problems for South Africa. Dem dey also demand tighter border controls, mass deportation, and for schools and health centres to serve South Africans first.
South Africa President Cyril Ramaphosa bin don warn against dis fight against immigrants. Di Ministry of Foreign Affairs reaffirm di Federal Government commitment to protecting Nigerians wherever dem dey and express appreciation to all stakeholders involved in di evacuation exercise.
