Di Speaker of House of Representatives don read letter for floor on Tuesday wey announce say Minority Leader Kingsley Chinda don defect from Peoples Democratic Party (PDP) go join All Progressives Congress (APC).
Di defection letter wey dem read, e get date of April 23, 2026. So afta di announcement, Chinda don resign im position as Minority Leader of di House.
Chinda wey be political ally of Minister of FCT Nyesom Wike, don recently secure APC governorship ticket for Rivers State ahead of 2027 elections. E become di party candidate afta Governor Siminalayi Fubara, Tonye Cole and George Kelly withdraw from di race.
Even though e be di only aspirant, party members still show up well well and queue to be counted for affirmation of im candidacy.
Apart from Chinda defection, di House also record oda defections. Anthony Adebayo Adepoju wey represent Ibarapa North Federal Constituency of Oyo State, defect from PDP go Allied Peoples Movement (APM).
Adedeji Stanley Olajide wey represent Ibadan North-West/Ibadan South-West Federal Constituity, also move from PDP go APM. Makanjuola Sunday Ojo wey represent Ogo-Oluwa/Surulere Federal Constituency, defect from PDP go APM.
Similarly, Najimdeen Oyeshina Oyedeji wey represent Iseyin/Itesiwaju/Kajola/Iwajowa Federal Constituency, Folajimi Oyekunle wey represent Ibadan North Federal Constituency, and Abass Adekunle Adigun wey represent Ibadan North-East/Ibadan South-East Federal Constituency, all for Oyo State, announce dia defection from PDP go APM.
Also joining APM from PDP na Auwalu Abdu Gwalabe wey represent Katagum Federal Constituency of Bauchi State.
Meanwhile, Etanabene Benedict wey represent Okpe/Sapele/Uvwie Federal Constituency of Delta State, defect from Labour Party (LP) go Peoples Democratic Party (PDP).
