Di Nigeria Democratic Congress (NDC) don hold dia presidential primary election on Friday, wey dem officially announce former Anambra State govnor Peter Obi as di party main flag bearer for 2027 general election.
Dis dey come as di 30 May deadline wey di Independent National Electoral Commission (Inec) set for parties to submit dia candidates don almost reach. Obi na di only candidate wey pick form for di NDC to contest for presidency, but di party still do primary to officially adopt am.
Across di kontri, di NDC dey continue wit primary elections for oda aspirants for different positions, from House of Representatives to Senatorial and govenorship seats. Di elections bin dey fixed for 27 and 28 May, but because of Eid-El-Kabir holidays wey bin fall inside dose days, di party say e cause logistic challenges.
For Kano State, wia former govnor Rabiu Kwankwaso na di leader of NDC, tori be say di party go adopt di immediate past deputy govnor, Aminu Abdulsalam Gwarzo, as dia consensus govnorship candidate. Gwarzo bin resign as deputy govnor afta e refuse to folo di govnor, Abba Kabir Yusuf, to decamp from New Nigeria Peoples Party (NNPP) to di ruling All Progressives Congress (APC). As Kwankwaso later leave di NNPP to di NDC, Gwarzo folo am, and by 2027 e go face im former oga for govnorship election.
For Rivers State, di NDC govnorship primaries dey even more interesting as Blessing Fubara Senior, di younger brother of current govnor Siminialayi Fubara, pick form to contest for di ticket. Di lesser known Fubara say e wan complete di tenure of Rivers Southeast Senatorial District, afta govnor Fubara bin withdraw from di APC govnorship primary. “I don vow to do only one 4-year tenure to bring di expected prosperity and development for River State,” Fubara tok, as e add say afta four years im go support anoda candidate.
For Delta State, former deputy senate president Ovie Omo-Agege don join di NDC afta losing di senatorial ticket of di ruling APC. Omo-Agege describe di NDC as “party wey dey built on di principles of inclusion, accountability, grassroots participation, and true federalism.”
As primary elections wrap up for different political parties, tins don dey clear about which candidates go contest di 2027 general election, especially di presidential seat. For di ruling APC, President Bola Ahmed Tinubu emerge candidate with almost 11 million votes. Many bin expect say Tinubu no go get challenger, but di APC tok say anoda aspirant, Stanley Osifo, folo am drag di ticket, but e only win 16,503 votes while Tinubu get 10,999,162 votes.
For di African Democratic Congress (ADC), former Vice President Atiku Abubakar win di presidential primary election. Atiku get 1,846,370 votes to defeat im rivals, former Rivers State govnor Rotimi Amaechi (504,117) and businessman Mohammed Hayatudeen (177,120). Di election almost scata di ADC as both Amaechi and Hayatudeen allege say plenty wuruwuru bin full for di process and reject results. However, on Thursday, Atiku bin pay Amaechi visit for im house for Abuja and dem snap foto as dem dey laugh.
For di Peoples Democratic Party (PDP), big internal crisis still dey go on. Di PDP dey divided into two factions. On Tuesday, 26 May 2027, di faction wey Minister of Federal Capital Territory Nyesom Wike dey support nominate former Senator Sandy Onor as consensus presidential candidate. Di oda faction, led by Tanimu Turaki, don clear former President Goodluck Jonathan as dia own candidate. But Jonathan imsef neva clearly tok say e dey interested for di presidential contest.
