Di Confederation of African Football, CAF, don reverse im earlier decision and return di Africa Cup of Nations to di two-year cycle, less than one year after di body announce say di tournament go move to every four years.
Di CAF Executive Committee unanimously approve di decision on Thursday, and CAF President Patrice Motsepe announce am after di organisation Strategy Conference wey hold for Cabo Verde from October 7 to 9, 2026.
For di statement wey CAF release, di body talk say: “The Executive Committee of the Confederation of African Football (CAF) unanimously decided on Thursday that the Africa Cup of Nations (CAN) will once again be held every two years.”
Di plan wey dem throway no be only about shifting AFCON to four years. E also carry di idea of one new Africa Nations League wey dem go play every two years as replacement competition for di continental showpiece.
But CAF explain say di proposed Nations League go need several years before e fit generate di kind money wey go support African football, make CAF competitions competitive worldwide and make dem stand on dia own financially. Na dat realisation push di executive committee to look di matter again.
Motsepe yarn say di committee position dey guided by wetin go protect African football, di 54 member associations and African players wey dey play for clubs outside di continent. “The decision by the CAF EXCO that the CAF AFCON should take place every Two Years was based on advancing, protecting and promoting the interest of African Football and CAF’s 54 Member Associations, as well as the interest of African players employed by Football Clubs outside Africa,” na so im talk.
Afrik-Foot report say di earlier four-year decision no go down well with some fans, wey knock CAF say di body dey copy Europe and dey dance to FIFA tune. Di report add say e take di continental governing body 11 months to realise di misstep and beat a retreat.
