Apple don set stage to launch im first ever foldable phone, and di phone wey pipo dey expect go answer iPhone Ultra. Di official reveal go happen for September 9 event, but before dat, Bloomberg reporter Mark Gurman don open mouth for interview with Tom’s Guide, and e yarn plenty tings about di phone features and di price wey dem fit sell am.
According to Gurman, di new iPhone Ultra go support MagSafe charging, even though di leaked renders and dummy units wey dey leak online no show di familiar magnetic ring wey we dey see for oda iPhones. Dis one shock plenty pipo, but Gurman say Apple get way to include am, because dem don already fit MagSafe inside di slim iPhone Air.
Gurman explain say di iPhone Ultra go be just 4.5mm thick when dem unfold am. Dat one go make am one of di thinnest foldable phones for market, and na serious engineering work wey Apple don do to fit all di components inside small space.
For display side, di iPhone Ultra go carry 5.5-inch cover screen wey you fit use when dem fold am, and 7.8-inch flexible inner screen wen dem open am. According to report, di crease wey dey always show for foldable screens go dey less noticeable compared to Samsung im Galaxy Z Fold8.
Gurman also mention oda features wey go dey inside di phone. E go get dual rear camera setup, Apple latest chipset and modem, plus durable hinge wey go make di folding dey smooth and last longer. All dis tins dey show say Apple don really put effort to make di first foldable iPhone strong and sweet.
