Di Met Office don extend dia thunderstorm warning for Wednesday, as downpours go continue to dey bring flood risk to parts of UK. Di yellow warning dey valid until 22:00 BST, and dem amend am Wednesday morning to cover northern and eastern Wales, plus north-west England, Midlands, and parts of eastern and southern England.
Di rain fit be heavy enough to cause flash flooding and travel wahala. Lightning and large hail also dey among di hazards wey pipo need to fear. Another yellow warning don already dey for Thursday, because more thunderstorms dey expected.
For some areas wey neva see rain well-well this August, di next few days fit bring di wettest weather in many weeks. Di Met Office yellow thunderstorm warning cover large area of England and Wales. After early cloud and rain, sunny spells go develop, but scattered thundery downpours go spring up for afternoon.
As much as 20-30mm of rain fit fall for some places within just one hour. E even fit reach 40-50mm over few hours. But because di showers dey hit-and-miss, some places go miss di rain completely, and weather apps fit struggle to give correct forecast.
Where di rain fall, flash flooding dey real concern. Dis one go especially be problem where ground don hard after di prolonged dry spell, so water no fit soak in quick. Driving conditions go difficult, and some roads fit close. Large hail and frequent lightning also possible.
Northern Ireland go see some showers, but dem likely no go too strong, and thunder no go plenty. Many parts of Scotland go remain dry with sunny spells, although south-west fit get some showers later.
Thursday go bring another zone of thunderstorms, again affecting mostly England and Wales. Di Met Office don issue another yellow warning, valid from 06:00 until 22:00 BST. Widespread rainfall totals of 20-30mm dey expected within three hours, and some areas fit see 50mm for same time. Eastern-facing hills wey dey exposed to easterly winds fit even record 75mm during 12 hours, and dat one go bring serious flood risk.
Gusty winds fit accompany di storms, especially for southern England on Thursday morning. Di showers fit eventually reach southern Scotland and Northern Ireland, but dem likely go weaken as dem drift northwards.
Despite di unsettled weather last week, some southern parts of UK neva still see plenty rain. Brize Norton for Oxfordshire don record only 0.4mm of rain so far dis August, less dan 1% of wetin dem normally expect for di whole month. For July, e only get 1mm. Kew Gardens record no rain at all for July, and only 1.8mm so far dis month. E mean say di rain wey dey expect dis week go far pass wetin don fall for some areas.
Thunderstorms dey very hit-and-miss. Some places fit see flooding downpours, while oda places wey dey only few miles away go avoid di heaviest rain and stay dry. Weather apps, including BBC Weather app, fit struggle for dis kind scenario. Forecasters know say di conditions dey ripe for storms, with warm humid air across UK dey interact with colder air from west for higher atmosphere. Dis one dey generate low pressure and instability. But di computer weather models wey dey drive weather apps go always struggle to pinpoint exactly where and when di biggest storms go spring up.
E dey like heating popcorn kernels for pan. You no fit know exactly which kernels go pop and for which order, and some fit not pop at all. Some of di storms go also happen for night, so dem fit not show for di daily weather icons. E good to dey check di hourly weather symbols and di percentage chances of rain if you dey make outdoor plans.
