‘Yan sanda sun kama mutane 5 da ake zargi da aikata laifuka a Ogun

Rundunar ‘yan sandan jihar Ogun, ta ce ta kama wasu mutane biyar da ake zargin ‘yan kungiyar asiri ne, wadanda suka kware wajen tono gawarwaki daga kaburbura da kuma cire sassan jikinsu domin yin tsafi.

Kakakin rundunar ‘yan sandan, Abimbola Oyeyemi, wanda ya bayyana hakan a wata sanarwa da ya fitar a Abeokuta ranar Lahadi, ya ce an kama wadanda ake zargin ne a ranar Asabar a Odogbolu.

Mista Oyeyemi ya bayyana sunayen wadanda ake zargin da Oshole Fayemi mai shekaru 60; Oseni Adesanya, 39; Ismaila Seidu, 30; Oseni Oluwasegun mai shekaru 69 da Lawal Olaiya mai shekaru 50.

Ya ce an kama wadanda ake zargin ne biyo bayan samun bayanan sirri da rundunar ‘yan sanda ta samu a hedikwatar shiyya ta Odogbolu, cewa ‘yan kungiyar na shirin sake yin wani zagayen girbin sassan jikin dan Adam a cikin garin Ososa.

Ya ce, nan take jami’in ‘yan sanda reshen Odogbolu, Godwin Idehai, ya tattara mutanensa tare da kutsawa maboyar wadanda ake zargin inda aka cafke biyar daga cikinsu.

“A yayin da ake yi musu tambayoyi, wadanda ake zargin sun yi ikirari da cewa su na cikin harkar tono gawarwaki daga kaburburansu.

“Sun ce galibi suna sayar da sassan jikin da aka tono ga abokan cinikinsu da ke amfani da su don yin ayyukan tsafi,” in ji shi.

A halin da ake ciki, kwamishinan ‘yan sandan jihar, Frank Mba, ya bayar da umarnin a mika wadanda ake zargin zuwa sashin binciken manyan laifuka na jihar domin gudanar da bincike mai zurfi tare da gurfanar da su gaban kuliya.

NAN

Credit: https://dailynigerian.com/police-arrest-suspected-22/