Turkiyya ta binciki roƙon kafofin watsa labarun neman taimakon ƙasashen duniya don yaƙar gobara

Masu shigar da kara na Turkiyya a ranar Alhamis sun kaddamar da bincike kan wani kamfen na kafofin sada zumunta na neman goyon bayan kasashen duniya don taimakawa yaki da gobarar daji da ke ci gaba da ci a kudancin kasar.

A cewar kamfanin dillancin labarai na kasar, Anadolu, ofishin mai gabatar da kara na gwamnati a Ankara yana binciken asusun sada zumunta kan zargin “haifar da tsoro da firgici” da kuma haifar da kiyayya tsakanin jama’a.

Zargin ya kuma hada da cin mutuncin jihar da shugaban kasar, Recep Tayyip Erdogan.

A baya, gwamnati ta hana kafafen sada zumunta na dan lokaci kamar Twitter da YouTube saboda irin wannan zargi.

A yayin da ake ci gaba da nuna bacin rai da yanke kauna kan matakin da gwamnati ta dauka game da gobarar, masu amfani da shafin Twitter da Instagram sun yi kira da neman taimako daga kasashen duniya ta hanyar amfani da maudu’in #HelpTurkey a cikin makon da ya gabata.

Yayin da Turkiyya ke fama da gobara mafi muni da aka gani cikin sama da shekaru goma, Erdogan ya sake musanta cewa kasar ta gaza gabatar da isassun matakan shiri, a cikin tsokaci ga mai watsa labarai A Haber da yammacin ranar Laraba.

Ya zargi ‘yan adawa da yada “ta’addancin karya.”

‘Yan adawar sun zargi gwamnati da barin jiragen kashe gobara mallakar gwamnati ba su aiki a filin jirgin sama da ke Ankara.

A cewar Mista Erdogan, an aike da jiragen kashe gobara 20 da jirage masu saukar ungulu 51 don taimakawa wajen shawo kan gobarar. Kasashen Croatia, Spain, Ukraine, Rasha, Iran da Azerbaijan duk sun aike da jiragen kashe gobara.

An shafe kusan kwanaki 10 ana ci da wutar daji a Turkiyya, musamman a kusa da Antalya da Mugla, shahararrun wuraren yawon bude ido.

A halin da ake ciki ƙungiyoyin agajin gaggawa sun kawo ƙarshen wuta a Milas, yammacin Turkiya, wanda ya kai ga tashar wutar lantarki a cikin dare.

An kwashe unguwanni da dama a yankin cikin dare, kuma sojojin ruwan sun taimaka wa wasu mazauna yankin cikin tsallaken tekun.

dpa/NAN