NDLEA ta kama tsohon dan Boko Haram, basaraken gargajiya bisa zargin safarar miyagun kwayoyi –

Hukumar yaki da sha da fataucin miyagun kwayoyi ta kasa NDLEA, ta kama wani tsohon mayaka na kungiyar ta’adda ta Boko Haram, Alayi Madu da kuma sarkin gargajiya, Baale Akinola Adebayo bisa zargin safarar miyagun kwayoyi.

Hakan na kunshe ne cikin wata sanarwa da kakakin hukumar ta NDLEA, Femi Babafemi, ya fitar ranar Lahadi a Abuja.

Mista Babafemi ya ce an kama basaraken ne a garin Kajola da ke kan iyaka tsakanin jihar Ondo da Edo.

Ya ce kamen wani bangare ne na ayyukan da ake yi na wanzar da miyagun kwayoyi a fadin kasar nan gabanin zabe mai zuwa.

Ya kuma ce da sanyin safiyar Juma’a, 10 ga watan Maris, jami’an hukumar NDLEA sun kai farmaki dajin Kajola da ke unguwar Kajola, da ke kan iyaka tsakanin jihar Edo da Ondo, inda suka lalata gonakin tabar wiwi guda uku, wanda girman ya kai hekta 39.801546.

“An kama mai gonakin da ke ikirarin shi Ba’ale na Kajola ne, Akinola Adebayo, mai shekaru 35, a gonar da karfe 2:30 na safe.

“Wasu mutane biyu da ake zargin ma’aikatansa ne: Arikuyeri Abdulrahman, mai shekaru 23 da Habibu Ologun, mai shekaru 25, an kuma kama su a wata bukka da ke kusa da gonakin.

“Haka kuma, wani Alayi Madu mai shekaru 26, wanda ya kasance mayakan Boko Haram na tsawon shekaru 15 kafin ya mika wuya ga sojojin Najeriya a 2021, jami’an NDLEA sun kama shi.”

Mista Babafemi ya ce an kama wanda ake zargin ne a ranar Alhamis, 9 ga watan Maris a kan hanyar Abuja zuwa Kaduna da kilogiram 10 na skunk.

A cewarsa, ya saya ne a garin Ibadan na jihar Oyo kuma yana daukar kayan da aka boye a cikin buhu zuwa Maiduguri, Borno.

“A cikin bayaninsa, Madu ya ce shi dan garin Banki ne da ke Borno kuma ya shiga fitacciyar kungiyar ta’addanci a shekarar 2006 yana dan shekara tara.

“Ya ce ya tuba kuma ya mika wuya ga sojoji a shekarar 2021, bayan da ya yi aikin gyarawa da kawar da tsattsauran ra’ayi a cibiyar gyaran tarbiyya ta Umaru Shehu, Maiduguri da kuma Malam Sidi de-radicalization centre, Gombe, kafin a sallame shi bayan ya shafe watanni shida.

“Bayan haka, ya yi tafiya zuwa Ibadan, jihar Oyo inda ya yi aiki a matsayin mai tuka babur (Okada Rider) kafin ya shiga fataucin miyagun kwayoyi sannan aka kama shi a hanyar Abuja zuwa Kaduna,” in ji shi.

NAN

Credit: https://dailynigerian.com/ndlea-arrests-boko-haram/