Najeriya da Cote D’Ivoire za su zurfafa alakar kasashen biyu

NNN HAUSA: Hukumar Kula da Man Fetur ta Najeriya (NMDPRA) da Ofishin Nazarin Fasaha da Ci Gaban Ivory Coast (BNEDTD) na hada kai don inganta dangantakar kasashen biyu.

Shugaban Hukumar NMDPRA, Farouk Ahmed ne ya bayyana haka a lokacin da ya karbi bakuncin wata tawaga daga kungiyar BNEDTD ta Ivory Coast a Abuja.

Tawagar ta samu jagorancin Mista Koue Alphonse, jakada, darakta mai kula da harkokin tattalin arziki da sa ido na ma’aikatar harkokin wajen kasar Cote d’Ivoire.

Ahmed, a wata sanarwa da ya fitar a ranar Juma’a, ya ce, dabarun da hukumar ta sa gaba, su ne jawo jari, fadada ayyukan man fetur da iskar gas da kuma mayar da Najeriya cibiya a yankin tare da yin tasiri a kasuwannin duniya.

Ya karfafa gwiwar Cote’d Ivoire da ta yi amfani da damar zuba jari a masana’antar makamashin Najeriya da aka samar ta hanyar aiwatar da dokar masana’antar man fetur (PIA) don inganta ci gaban tattalin arziki da ci gaba mai dorewa.

“Wasu daga cikin wadannan damar saka hannun jari sun hada da samar da LNG, propane da butane ga Cote’d Ivoire da sauran kasashen ECOWAS,” in ji shi.

Ahmed ya tabbatar wa tawagar cewa NMDPRA za ta tallafa da kuma karfafa zuba jari a ayyukan more rayuwa, tace iskar gas da sufuri.

Tun da farko, Alphonse ya ce makasudin ziyarar ita ce nazarin tsarin gudanar da aiki a bangaren tsakiya da na kasa da nufin fadada da inganta hadin gwiwa tsakanin kasashen biyu.

Shirin ya ba da haske kan yadda hukumomin da ke kula da makamashin Najeriya ke gudanar da ayyukansu da kuma duba hanyoyin da za a fadada da kuma inganta bangarorin da za su kara yin hadin gwiwa a tsakanin kasashen biyu.

(NAN)