Ministan ya bada umarnin gudanar da bincike cikin gaggawa kan hatsarin jirgin kasa a Legas

Ministan sufurin jiragen sama, Sen. Hadi Sirika, ya umarci hukumar binciken lafiyar Najeriya, NSIB, da kwararru da su gaggauta gudanar da bincike kan hatsarin jirgin da fasinja ya yi da wata motar safa a jihar Legas.

Hakan na kunshe ne a cikin wata sanarwa dauke da sa hannun James Odaudu, mataimaki na musamman ga ministan kan harkokin jama’a.

Mista Sirika, wanda ya bayyana hatsarin a matsayin abin takaici, ya kuma baiwa jama’a tabbacin irin karfin da ofishin ke da shi na zakulo musabbabin hatsarin nan da nan da kuma samar da hanyoyin da za a bi domin dakile afkuwar hakan a nan gaba.

Rahotanni sun bayyana cewa, mutane biyu ne suka mutu a hatsarin yayin da da dama suka samu raunuka daban-daban a lokacin da wani jirgin kasa mai motsi ya kutsa cikin wata motar BRT a tashar motar PWD dake unguwar Ikeja.

Jirgin fasinja da motar bas da ke jigilar ma’aikata zuwa wuraren aikinsu a Legas, sun yi karo da safiyar Alhamis.

Ministan ya nemi hadin kan jama’a yayin da aka fara gudanar da bincike na kungiyar NSIB.

Ya jajanta wa gwamnati da al’ummar jihar Legas, musamman wadanda suka rasa ‘yan uwansu, bayan faruwar lamarin.

Ministan ya yi addu’ar Allah ya jikan wadanda suka jikkata a hatsarin.

NAN

Credit: https://dailynigerian.com/minister-directs-investigation/