Mambobin APC 1,868 sun koma PDP a Sokoto

‘Yan jam’iyyar All Progressives Congress (APC) a jihar Sokoto akalla 1,868 ne suka sauya sheka zuwa jam’iyyar PDP.

Hakan na kunshe ne cikin wata sanarwa da kakakin jam’iyyar PDP na jihar, Malam Hassan Sanyinnawal ya fitar a Sokoto ranar Alhamis.

A cewar Mista Sanyinnawal, ‘yan kasuwa ne daga al’ummomi 10 a fadin jihar, shugaban jam’iyyar PDP na jihar, Alhaji Bello Goronyo ya tarbe su a Sokoto ranar Laraba.

Ya kara da cewa Mista Goronyo wanda ya samu wakilcin shugaban jam’iyyar na shiyyar Sakkwato ta tsakiya, Muhammad Dangoggo, ya tabbatar wa sabbin wadanda suka shigo jam’iyyar daidai wa daida da sauran ‘ya’yan jam’iyyar PDP.

Shugaban jam’iyyar PDP ya yi alkawarin daukar sabbin ‘ya’yan jam’iyyar, yayin da ya yi kira gare su da su yi amfani da kwarewarsu a harkokin siyasa da kasuwanci don tabbatar da nasarar jam’iyyar a babban zaben 2023 mai zuwa.

Shima da yake nasa jawabin dan takarar gwamnan jihar a karkashin jam’iyyar PDP Sa’idu Umar ya yi maraba da sabbin ‘ya’yan jam’iyyar, ya kuma yi alkawarin hada kai da dukkaninsu domin samun nasarar jam’iyyar.

Umar ya taya wadanda suka sauya sheka murna, yana mai cewa, “Shawarar da suka yanke ya nuna kishinsu na goyon bayan kyakkyawan salon shugabanci na Gwamna Aminu Tambuwal.”

Lawali Lalala, wanda ya yi magana a madadin wadanda suka sauya sheka ya ce sun yanke hukuncin ne sakamakon samun su da yunkurin ci gaban da gwamnatin PDP ke yi a jihar.

Mista Lalala ya yi alkawarin ba jam’iyyar PDP cikakken biyayya da goyon bayansu tare da ba da tabbacin yin aiki tare da shugabannin jam’iyyar wajen tabbatar da nasarar ta a babban zabe mai zuwa.

NAN