Gwamnatin Nasarawa ta ba da umarnin rufe dukkan makarantun firamare da sakandare –

Gwamnatin jihar Nasarawa ta bayar da umarnin rufe dukkan makarantun gwamnati da masu zaman kansu cikin gaggawa a fadin jihar, biyo bayan barazanar tsaro a babban birnin tarayya Abuja da sauran sassan kasar nan.

Kwamishiniyar ilimi ta jihar Fati Sabo ce ta bayyana hakan a karshen wani taron majalisar zartarwa na jihar da aka fadada a ranar Laraba.

Misis Sabo ta ce matakin ya zama dole saboda kusancin jihar da babban birnin tarayya Abuja da kuma kudurin gwamnatin Gwamna Abdullahi Sule na tabbatar da cewa makarantun Nasarawa suna gudanar da ayyukansu cikin yanayi mai kyau.

Sai dai ta bayyana cewa daliban da ke rubuta jarabawar SSCE ba a kebe su ba saboda gwamnatin jihar ta sanya isassun matakan da za su tabbatar da tsaron lafiyar su a lokacin jarrabawar.

Misis Sabo ta ce: “Muna kira ga iyaye da kada su firgita. Dukkanmu mun san jihar Nasarawa tana lafiya amma an dauki wannan matakin ne a matsayin wani mataki na tabbatar da ‘ya’yanmu sun tsira kuma a ci gaba da zaman lafiya. Wato wadanda ke cikin jihar da wadanda suka zo daga wasu jihohi su yi karatu a nan.

“Muna kuma kira ga shuwagabanninmu da shugabannin makarantunmu, da su kuma tabbatar da cewa yayin da muke rufe wadannan makarantu, mun yi su cikin tsari.

“Babu wata barazana ga rayuwa ko dukiya a halin yanzu a jihar Nasarawa. Kuma kamar yadda na ambata, yana daga cikin matakan da gwamnati ta dauka.

“Dukkanmu muna sane da cewa gwamnatin Abdullahi Sule ta ba da fifiko kan tsaro da kare rayuka da dukiyoyi a Jihar Nasarawa.”