Ana fargabar an sace wasu ‘yan kasar China 4 yayin da ‘yan ta’adda suka kai hari a wurin hakar ma’adinai a Nijar

Daga Umar Audu

Wasu ‘yan ta’adda da aka fi sani da ‘yan bindiga sun kai hari a wani wurin da ake hakar ma’adanai a kauyen Ajata Aboki da ke karamar hukumar Shiroro a jihar Neja, inda suka yi awon gaba da wasu ma’aikatan da ba a tantance adadinsu ba, ciki har da ‘yan kasar China hudu.

An tattaro cewa lamarin ya faru ne da misalin karfe 6.00 na yammacin ranar Laraba.

Gwamnatin jihar ta tabbatar da harin a wata sanarwa da kwamishinan tsaron cikin gida na jihar, Emmanuel Umaru ya fitar ranar Alhamis.

A cewarsa, cikin gaggawar tawagar jami’an tsaro ta hadin guiwa zuwa wurin da lamarin ya faru, domin amsa kiran da gwamnati ta yi mata.

“Saboda haka, rundunar hadin guiwar jami’an tsaro sun yi artabu da ‘yan ta’addan, kuma har yanzu ba su tantance adadin wadanda suka mutu daga bangarorin biyu ba.

“Duk da haka, an ce an sace wasu ma’aikatan da ba a tantance ba a wurin hakar ma’adinan da suka hada da ‘yan China hudu.

Umaru ya kara da cewa, “An karfafa jami’an tsaro domin farautar sauran ‘yan ta’addan yayin da aka kashe wasu daga cikinsu tare da ceto wadanda suka jikkata ciki har da jami’an tsaro.”

Kwamishinan ya ce an kwashe wadanda suka jikkata zuwa asibitocin gwamnati domin kula da su.

“Yayin da gwamnatin Neja ke jajantawa shugabannin hukumomin tsaro a jihar da kuma iyalan wadanda aka kashe, gwamnatin jihar ta ba da tabbacin cewa sadaukarwar da suka yi ba zai tafi a banza ba.

“Gwamnatin jihar ta amince da duk kokarin jami’an tsaro na hadin gwiwa da na al’umma na ganin an shawo kan matsalar rashin tsaro a wasu sassan jihar,” in ji shi.

Malam Umar ya bukaci jami’an tsaro da kada su karaya wajen gudanar da ayyukansu na tsarin mulki a kan duk wata barazana.

Ya kuma ba da tabbacin cewa gwamnatin jihar za ta ci gaba da ba su tallafin da ake bukata domin ganin sun kawar da ‘yan fashi a jihar.

Kwamishinan ya kara da cewa gwamna Abubakar Bello ya umarci jami’an tsaro da su tabbatar da an dawo da wadanda aka yi garkuwa da su lafiya.