Ambaliyar ruwa da zabtarewar kasa sun kashe mutane 120 a Kinshasa

Akalla mutane 120 ne suka mutu bayan ruwan sama kamar da bakin kwarya a babban birnin Jamhuriyar Demokradiyyar Kongo, a cewar gwamnati.

Ruwan sama ya haifar da babbar ambaliyar ruwa da zabtarewar kasa a daren ranar Talata a wasu sassan birnin Kinshasa, babban birni mai kusan mutane miliyan 15.

Ministan cikin gida Daniel Aselo ya shaidawa dpa cewa mutane da dama sun jikkata kuma an kai su asibitocin da ke kusa.

Masu aikin ceto sun ci gaba da neman wadanda suka tsira da ransu a ranar Laraba a yankunan da ambaliyar ruwa da zabtarewar kasa ta shafa.

Shugaban kasar Felix Tshisekedi, wanda a halin yanzu yake halartar taron shugabannin kasashen Afirka da Amurka ta shirya a birnin Washington, ya yi kira ga majalisar ministocinsa da ta gaggauta daukar mataki kan bala’in.

Mista Tshisekedi ya ayyana kwanaki uku na zaman makoki na kasa. Rahotanni sun ce yana shirin katse zamansa a Washington da kuma dawowa da wuri.

A cewar kungiyar agaji ta Red Cross, ruwan sama kamar da bakin kwarya ya kwashe daukacin gidaje a gundumomin Mont-Ngafula da Ngaliema na Kinshasa.

Hanyoyi da dama a kasar sun cika da ambaliyar ruwa, ciki har da titin kasa mai lamba 1, babbar hanyar kasuwanci zuwa Angola.

Kamar yawancin manyan biranen Afirka, Kinshasa na fama da rashin isassun kayayyakin more rayuwa da najasa.

dpa/NAN