Ukrainian forces don carry out missile attack wey hit deep inside Russia, striking one major military plant overnight. President Volodymyr Zelensky don confam di news.
E say FP-5 Flamingo cruise missiles strike di drone and missile plant for Cheboksary city, inside Chuvash Republic. Di place dey more dan 900 kilometres from di front line.
Local officials report say three people bin injure for di missile attack for di city. Ukraine also tok say dem hit di Moscow-occupied port of Mariupol for Sea of Azov, one Russian oil refinery for Samara, and one “shadow fleet” oil tanker for Black Sea.
For recent months, Ukraine military don intensify dia drone strikes on key facilities across Russia. Kyiv dey argue say energy sites be legitimate targets, because dem allow Moscow to continue dia war effort. But missile attacks deep inside Russia don dey rare.
Russia military say dia air defence units bin intercept or shoot down 326 Ukrainian drones over some regions overnight. Meanwhile, Ukraine air force say dem down 181 out of 207 drones wey Russia fire during dat time. Dem also admit 21 direct hits for 14 locations.
At least two people don die and 26 injure, including two children, for four Ukrainian regions for di past 24 hours, local officials tok.
For one post on Telegram on Wednesday, President Zelensky write: “Overnight, Ukrainian FP-5 Flamingos hit a military plant in Cheboksary wey dey supply di occupier’s army with components for drones and missiles.” E also publish footage wey suppose show one missile flying toward its target and plumes of smoke from one facility.
Ukraine military later say di VNIIR-Progress plant don dey struck and there don be fire for di site. Chuvash Republic head Oleg Nikolaev confirm say Cheboksary don dey hit, reporting three injuries. E no say weda di military plant damage.
Di FP-5 Flamingo missile get 1,150 kilogram warhead and reported range of 3,000 kilometres, wey dey put Russia capital Moscow and oda major cities well inside its range. Together with its Western allies, Ukraine don dey actively develop oda types of missiles to maximise di costs of Russia full-scale invasion wey dem launch for 2022 and force Moscow to seek settlement.
Russian President Vladimir Putin don so far reject all negotiation proposals. Last week, Putin tok say e no see any point for meeting Zelensky after di Ukrainian leader request face-to-face talks to try to end di war. Di Kremlin leader also insist say Russian troops dey advance everywhere for di vast front line – although evidence show say di front don virtually static for di past some months.
