Paris Jackson, di 28-year-old daughter of late pop legend Michael Jackson, don carry her papa estate go court, dey ask make dem release $600 million to di family trust wey suppose dey cater for her and her two brothers, Prince Jackson, 29, and Bigi Jackson, 24.
For di court papers wey New York Times, People and E! News see, Paris accuse di people wey dey manage di estate of incompetence and financial mismanagement. Global News tok say dem never personally view di court documents.
Di filing tok say di estate don generate billions of dollars since Michael Jackson die for 2009, but di trust wey dem suppose use provide for im children never receive any funding. Paris dey ask one judge for Los Angeles make e order say dem release part of di estate assets go di Michael Jackson Family Trust.
According to di petition, Michael Jackson leave instruction say each of im three children suppose start to dey collect income from dia share of di trust once dem reach 21. More money go come to each child when dem reach 30, and anoda round when dem reach 40.
For statement wey e send Global News, di estate claim say more dan $200 million don already comot.
