Ghana head coach Carlos Queiroz don call on supporters to back di Black Stars as dem look to respond to dia opening defeat for di 2027 Africa Cup of Nations (AFCON) qualifiers against The Gambia on Tuesday.
Di Black Stars chop 2-0 defeat to Ivory Coast for Bouake last Thursday. Malick Yalcouye and Franck Kessie score for di hosts.
Queiroz believe say Ghana fit learn from di defeat. Since dat match, im don use di days to address areas wey need improvement before di Group C encounter for Accra Sports Stadium.
‘My view about the football matches. We always win or learn and we learned something in that game against Ivory Coast and that’s why we focus in some aspects of preparations,’ Queiroz talk.
‘The boys are ready with a lot of motivation. My message to the fans is one of confidence, trust, and your support,’ im add.
‘We cannot hide the reality, we are facing a couple of challenges, a couple of problems but Black Stars is not a problem. Black Stars was never a problem, Black Stars is not a problem and Black Stars will never be a problem in the future,’ im yarn.
Ghana go face Tuesday match without Alexander Djiku and Ronald Donkor. Djiku, wey captain Ghana against Ivory Coast, comot for di defeat after injury. Dem rule am out of di game against The Gambia after im fail to recover in time. Donkor also go miss di fixture through injury. Di New York Red Bulls midfielder collect im first senior call-up from Queiroz for di September international window after im impress for Major League Soccer.
Even with di absentees, Queiroz talk say 22 players dey fit and available for di crucial qualifier. Im urge supporters make dem get behind those selected.
‘We have 22 players ready for tomorrow. Those are the most important players of Black Stars. Come here to support them,’ im add.
Ghana dey find dia first points of di qualifying campaign after dem lose dia opening Group C fixture for Ivory Coast. The Gambia, meanwhile, go look to make am two wins out of two after dem narrowly beat Somalia on matchday one.
Di match set for Tuesday, September 29th for Accra Sports Stadium, with kick-off at 4:00pm Ghana time. Ghana go then round off di international window with a friendly against Morocco for Tangier on October 4th.
