Di Office of di National Security Adviser (ONSA) don tell Nigerians make dem no dull – dem say make all pipo continue to dey careful and take protective measures as security wahala fit show for some parts of di kontri.
Di agency tok say e dey important for everyone to dey ready for any security problem wey fit comot. Dis one come inside a security statement wey ONSA release, and dem don share am with security agencies so dem fit take di correct step, according to Premium Times.
Di statement, wey get date 27 August, don mention di killing of some members of Islamic State West Africa Province, ISWAP, including dia commander, Abubakar Mainok.
Dem kill Mainok, wey dem also know as Abu Bilal al-Minuki, along with im fighters during one joint operation wey Nigerian and American soldiers carry out. Di operation happen for March, when di joint forces attack dia camp wey dey one island for Borno.
ONSA say dis statement come at di time wey Nigerian security agencies dey do operation for North East, North West, and North Central. Di agency say di operations don succeed well well for confronting ISWAP and oda criminal groups.
Di operations don lead to di death of some terrorist commanders and bandits, including Abubakar Al-Mainok. Dem don also scatter camps, hideouts, and oda places wey di criminal groups dey use for different areas.
ONSA warn say di terrorist groups fit try to carry out separate attacks to cause fear or make pipo notice dem. Despite di losses wey dem suffer, di report say dem still dey attack military camps.
Dem dey target civilians and major roads for northern Nigeria as dem dey try to spread dia activities. So ONSA advise Nigerians make dem stay vigilant at all times and dey check di security situation for where dem dey stay.
Di agency also urge state and local governments make dem strengthen community surveillance and support measures wey go help stop security threats. E also mention say federal government dey try as bandits dey attack some areas for Kaduna state and oda villages for Nigeria.
Di National Security Adviser, Mallam Nuhu Ribadu, don talk about di successes wey di Bola Tinubu government don get for protecting lives. E ask di public make dem continue to give security agencies useful information, because e dey very important for protecting dia lives and property.
