Di Inspector General of Police, Olatunji Disu, don give order to all police personnel across di whole Nigeria say make dem deal with those wey dey carry illegal firearms anyhow.
He tell dem say make dem apply Force Order 327 to stop di loss of police officers when dem dey face criminals, so dat peace fit return for Benue State.
Disu give dis order during di IGP town hall meeting wit Governor Hyacinth Alia for Makurdi, di capital of Benue State, as part of im operational visit wey follow di plenty killings wey don happen for di state.
Di IGP listen to di participants wey raise key points about di way di attack for Benue don take new shape, and dem also ask why police no dey arrest security threats even when intelligence dey available.
For im response, di IGP direct police personnel say make dem engage criminals wey dey carry arms without waiting for any specific order, because Force Order 327 dey protect dem and innocent people from attack.
He also task youths for Benue State say make dem work wit police for intelligence gathering against all forms of criminality, because police go deal wit criminals no matter where dem come from.
To support dis directive, Governor Alia call for di implementation of state police to help di conventional police handle insecurity. Di Tor Tiv also pledge full support for any strategy wey go end di killings.
Di meeting wey hold for Makurdi bin get attendance from security chiefs of Nigerian police and oda sister agencies.
